Aadam Alaihay salam

☆ (Part 2): Aadam (Alaihay Salam)

Hazrat Aadam (Alaihay Salam) Aur Bibi Hawwa Ko Zameen Par Utara Gaya.

Aziz Dosto …. Jab Shaitaan Mardood Aur Laanati Ho Gayaa Toh Uske Jannat Me Dakheele Par Paabandi Lag Gayee. Ab Woh Jannat Me Dakheel Nahi Ho Sakta Tha.

Hazrat Aadam (Alaihay Salam) Jab Uth Kar Baith Gaye To Unhe Cheenk Aa Gayee Aur Tab Aadam (Alaihay Salam) Ne Alhamdulillah Ke Alfaaz Adaa Kiye. Allah Subhanahu Ta’ala Ne Aadam (Alaihay Salam) Ko Ilm Aur Hiqmat Ki Baate Sikhayee Garaz Ye Ki Aaj Duniya Me Jitni Bhi Zubaane, Bhashaye, Ya Boli Ya Boli Jaati Hai Woh Sab Aur Duniya Ke Tamaam Uloom Sikhaaye Aur Tamaam Chizo Ke Naam Bhi Sikhaaye.

Fir Allah Ta’ala Ne Tamaam Farishto Ke Saamne Hazrat Aadam (Alaihay Salam) Ko Huqm Diya, “Aye Aadam ! Bayaan Kar Jo Bhi Baate Aur Ilm, Maine Tujhe Sikhaayee Hai, Agar Tu Sacha Hai”. Hazrat Aadam (Alaihay Salam) Ne Woh Saari Baate Aur Woh Sara Ilm Jo Allah Ta’ala Ne Unhe Sikhayee Thi Sab Farishto Ke Saamne Bayaan Kar Di. Iss Par Tamaam Farishto Ne Ek Saath Kahaa, “Paak Hai Tu, Aye Hamaare Rab ! Beshaq Tu Jo Jaanta Hai, Ham Wo Nahi Jaante, “Aur Allah Ta’ala Ne Hazrat Aadam Ko Jannat Me Rahne Ka Huqm Diya, Aur Iss Tarhaa Aadam (Alaihay Salam) Jannat Me Rahne Lage.

Jannat Me Khaane Pine Aur Ghumne Firne Ko Bahut Kuch Tha. Lekin Tanhaa Akele Hone Ki Wazah Se Aadam (Alaihay Salam) Udaas Rahne Lage. Fir Allah Ta’ala Ne Aadam (Alaihay Salam) Ki Baayee Pasli Se Bibi Hawwa Ko Banaya. Iss Tarhaa Woh Dono Ek Dusre Ka Saath Pa Kar Khushi Khushi Jannat Me Rahne Lage. Allah Ta’ala Ne Farmaaya, “Tum Dono Jannat Me Jo Chaahe Khaavo Piyo Aur Ghumo Firo, Lekin Khabardaar Uss Mamnuwaa Sajar (Tree) Ke Paas Mat Jaana Aur Uss Ka Fal Mat Khaana Warna Tum Log Zaalimo Me Se Ho Jaaoge. Ek Riwaayat Me Hai Ki Woh Sajar Gandoom (Gehoo) Ka Tha Ya Uss Se Milta Julta Tha. (Allah-U-Aalam )

Riwayato Me Aata Hai ke – Iblis ne Saanp ki Surat me Bibi Hawwa Aur Aadam (Alaihay Salam) Se Mulaaqat Ki Aur Kahaa, “Mai Tumhaara Khairkhawaah Hoon, Tum Dono Ne Jannat Ke Uss Sajar Ka Fal Kyon Nahi Khaaya ?. Is Par Wo Dono Bole Ki, “Hame Allah Ta’ala Ne Uss Sajar Se Door Rahne Ke Liye Kahaa Hai, Isiliye Ham Ne Wo Fal Nahi Khaaya”.

Jab Aadam (Alaihay Salam) So Gaye Toh Shaitaan Ne Bibi Hawwa Ko Bahekaaya Aur Kahaa, “Allah Ta’ala Ne Tumhe Wo Fal Khaane Se Isiliye Manaa Kiya Hai Ki Kahi Wo Fal Khaa Kar Tum Farishte Na Ban Jaawo Aur Hamesha Ke Liye Jannat Me Na Rahne Lago”.
Bibi Hawwa Ne Shaitaan Ke Bahkaave Me Aakar Wo Fal Khaa Liya Aur Jab Aadam (Alaihay Salam) So Kar Jaage Toh Unhe Bhi Bahut Israar Kar Ke Wo Fal Khilaa Diya”.

Jaise Hi Un Dono Ne Wo Fal Khaaya Unka Jannat Ka Libaas Utar Gayaa. Aur Wo Dono Sharam Ke Maare Apni Apni Sharmgaah Chupaane Lage.
Tab Hi Allah Ta’ala Ne Kahaa, “Maine Tum Se Nahi Kahaa Tha Ki Uss Sajar Ke Paas Mat Jaana Aur Uska Fal Mat Khaana?. Tum Dono Ne Apni Jaan Par Zulm Kiya. “Aadam (Alaihay Salam) Ko Apni Galti Ka Ehsaas Huwa. Unhone Allah Ta’ala Ki Baargaah Me Apne Gunaaho Ki Maafi Maangi.

Allah Ta’ala Ne Farmaya,
♥ Al-quran : Tab Shaitan Ne Aadam Aur Hawwa Ko Dhoka Dekar Waha Se Dagmagaaya Aur Aakhirkaar Unko Jis (Aish Wa Rahat) Me The Unse Nikal Feka Aur Ham (Allah) ne Kaha (Aye Aadam! Wa Hawwa) Tum Zameen Par Utar Pado. Tum Me Se Ek Ka Ek Dushman Hoga Aur Zameen Me Tumhare Liye Ek Khas Waqt (Qayamat) Tak Thahraaw Aur Thikana Hai. –(Surah Bakrah Aayat No.36)

                                                                           محمد توصيف

Allah ne sab se pehle pen (KALAM) ko piada kiya

☆ (Part 1): Roo-e-Zameen Ki Ibteda

!!! Bismillah Hir Raheman Nir Rahim !!!

Allah Hi Behtar Janta Hai Ke Khilkat Ka Aagaz Kis Afrad Se Hua. Ya Kiya Gaya. Riwayato me Aata Hai Ke Allah Ta’ala Ne Roo-e-Zameen Ki Ibteda Me Sab Se Pehele Kalam (Pen) Ko Paida Kiya, Riwaayato Me Hai Ki Zameen Ki Takhleekh (Banaane) Ke 50,000 Hazaar Saal Pahele Allah Ta’ala Ne Qalam (Pen) Ko Paida Kiya.
Allah Ta’ala Ne Qalam (Pen) Ko Huqm Diya, “Likh (Write) Toh Sab Se Pahele Qalam (Pen) Ne Bismillah Hir Rahemanir Rahim Likha, Yaani Ki Allah Ke Naam Se Shuru, Jo Ki Bahut Rahem Karne Wala Aur Bahut Meharbaan Hai. (Allahu Alam)

Allah Ta’ala Ne Fir Huqm Diya, “Likh (Write)! Iss Par Qalam Ne Arz Kiya, “Aye Mere Rab ! Kya Likhoo? Allah Ta’ala Ne Huqm Diya, “Ab Se Qayaamat Tak Jo Bhi Hone Wala Hai, Woh Sab Likh De”. Aur Qalam Ne Tab Se Lekar Qayaamat Tak Jo Bhi Hona Hai Woh Sab Likh Diya Jo Ki Lohe Mahefooz Me Darz Hai.

Fir Allah Ta’ala Ne Farishto Ko Noor Se Paida Kiya, Jinnato Ko Aag Se. Aur Insaan Ko Mitti Se Paida Kiya. Farishte Din-Raat Allah Ki Ibaadat Aur Hamd-O-Sana Karte Hai. Aur Allah Ne Unhe Jis Kaam Par Ma’amoor Kiya Hai Farishte Uspe Amal Karte Hai. Aur Thakte Bhi Nahi.

Allah Ne Ham Insaano Se Pahele Jinnato Ko Aag Se Banaaya Aur Unhe Zameen Ka Khalifa (Waris) Banaya. Iblees Jo Ki Jinnato Me Se Tha Uska Naam Azazil Tha, Aur Woh Bahut Ibaadat Guzar Tha. Duniya Ka Koi Bhi Kona Nahi Bacha Jahaa Usne Sajda Na Kiya Ho. Isi Wajah Se Woh Allah Ke Muqarab Bando Me Se Tha. Yahaa Tak Ki Woh Jannat Me Bhi Be Rok-Tok Aaya Jayaa Karta Tha.
Allah Ta’ala Ne Jinnato Ko Apni Ibaadat Ke Liye Banaaya Tha, Lekin Jinnat Sirkash Ho Gaye Aur Zameen Par Fasaad Karne Lage. Qatal-O-Gairat Karne Lage.

Allah Ne Farishto Se Kahaa, “Mai Insaan Ko Zameen Ka Khalifa (Waris) Banaane Wala Hoon. “Iss Par Farishto Ne Khadsaa Zaahir Kiya Ki Insaan Bhi Zameen Par Fasaad Karega Aur Qatal-O-Gairat Karega. Teri Ibaadat Ke Liye Ham Hi Kaafi Hai.
Allah Ta’ala Ne Kahaa, “Main Jo Jaanta Hoon Wo Tum Nahi Jaante”.

Allah Ta’ala Ne Mitti Ke Khameer Se Aadam Ka Putlaa Tayyar Kiya. Ek Riwaayat Me Hai Ki Aaj Jahaa Khana-e-Kaaba Hai, Uss Jagah Se Mitti Li Gayee. Aur Ek Riwaayat Me Hai Ki Saat (7) Alag-Alag Jagaho Se Mitti Le Kar Khamira Tayyar Kiya Gayaa. Aur Uss Se Aadam Ka Putlaa Banaaya Gayaa.
Allah Ta’ala Ne Farishto Se Kahaa, “Jab Main Iss Putle Me Apni Rooh Fookoo (Daaloo) To Tum Sab Sajde Me Gir Jaana”. Jab Allah Ta’ala Ne Aadam Ke Putle Me Rooh Daali Toh Sab Ne Sajdaa Kiya Siwaaye Iblees Ke.
Allah Ta’ala Ne Iblees Se Poocha, “Jab Sab Ne Sajdaa Kiya Toh Tune Kyon Nahi Kiya? , Tujhe Kis Cheez Ne Roka ?. “Iblees Ne Apni Galti Nahi Maani Aur Takabbur (Ghamand) Se Kahaa. “Mai Iss Se Afzal (Behtar) Hoon, Tune Mujhe Aag Se Paida Kiya Aur Ise Sadi Huyee Mitti (Khanakti Huyee Mitti) Se Paida Kiya”.

Allah Ta’ala Ne Kahaa, “Nikal Ja Yahaa Se, Aaj Se Tu Razim (Dhutkaara) Huwaa Hai, Aur Tujhpe Laanat Hai”.
Iblees Ne Kahaa, “Aye Mere Rab, Jis Ki Wazah Se Tune Mujhe Dhutkaara Aur Laanat Ki, Mujhe Qayaamat Tak Mohlat De Ke Mai Ise Aur Iss Ki Aulaado Ko Gumraah Karoo Aur Inhe Teri Raah Se Rokoo, Aur Mai Chahe Aage Se Piche Se Upar Se Niche Se Jahaa Se Bhi Aawoo Koi Mujhe Dekh Na Sake”.

Allah Ta’ala Ne Kahaa. “Mujhe Apne Jalal Ki Kasam, Ja Tujhe Mohlat Di, Lekin Mai Tujhe Aur Jo Teri Pairvi Karega Unn Sab Ko Jahannum Me Bhar Dooga. Aur Insaano Ki Rahenumaayee Ke Liye Mai Apne Nabiyo Aur Rasoolo Ko Bhejooga. Jo Bhi Muttaqi Aur Parhezgaar Hoga Aur Nek Amal Karega Mai Usey Jannat Me Jagah Dooga”.

                                                                                                                                                                محمد توصيف